Cuarta Mobilidade: viaxe a Romanía

Silleda. Maio de 2023.

O 2 de maio chegou a última viaxe do proxecto. Esta vez 6 alumnos e alumnas do IES Pintor Colmeiro acompañados das profesoras Marta Aguirre e Laura López viaxaron a Romanía para traballar de novo o tema da inmigración e dos refuxiados baixo o lema “Citizens of future”.

Despois dunha longa viaxe chegamos á cidade onde estariamos 5 días, Lugoj, a cidade do noso centro anfitrión Liceul Tehnologic «Aurel Vlaicu».

A nosa primeira actividade foi a visita ao Centro Cultural Ucraíno de Timisoara “Uniunea Ucrainienilor din România”, onde fomos recibidos polo presidente da asociación e membros da mesma. Alí nos explicaron como traballan cos refuxiados para integralos na cidade e no sistema educativo de maneira que nos esquezan os seus costumes e a súa  tradición. Alí imparten clases de romanés  e fan exposicións de arte ucraíno.

Despois desta actividade tan enriquecedora, fixemos un tour pola multicultural cidade de Timisoara Capital da Cultura Europea 2023, un lugar cargado de historia reflectida nas súas prazas e edificios. 

O xoves día 4 vistamos dúas localidades da rexión de Transilvania cheas de historia Deva e Hunedoara, exemplos de cidades medievais. En Deva visitamos a fortaleza “Cetatea Devei” , acompañados dun guía que nos contou toda a historia desta fortificación. 

Pola tarde visitamos o castelo de Hunedoara, como todo castelo ten a súa lenda, deste lugar se conta que alí estivo preso durante 7 anos Vlad Tepes «El Empalador», personaxe histórico que inspirou a novela «Drácula», de Bram Stoker.

O venres día 5 todo o alumnado participante do proxecto traballou no centro anfitrión.O tema de traballo foi “Citizens of the future” onde tomando como referencia libros e películas imaxinaron como sería o mundo no 2040.

Despois das presentacións dos traballos, entregáronse os diplomas e houbo unha cerimonia de clausura.

E así rematou a nosa última mobilidade onde unha vez máis o mellor foi a convivencia e a interculturalidade do programa.  Traballamos intentando poñer o noso gran de area cara o cumprimento do obxectivo 10 da Axenda 2030.

Anuncio publicitario

Terceira mobilidade: viaxe a Nápoles

Silleda. Febreiro de 2023.

Entre os días 13 e 17 de febreiro tivo lugar a terceira mobilidade do programa. Acompañados polos profesores Elvira Rey Casais e Javier María López, seis alumnos do noso instituto acudiron á cidade de Nápoles onde esta vez exerceron como anfitrións os profesores e profesoras do instituto Polo Tecnico “Fermi-GAdda”, acompañando tamén a estadía dos nosos compañeiros de  Brilon (Alemaña) e Lugoj (Romanía).

Tras a recepción oficial, realizouse unha visita ás instalacións do centro, maiormente vencelladas a contidos tecnolóxicos como a electrónica ou telecomunicacións entre outras. Tamén se realizaron, por parte do alumnado do centro, as primeiras presentacións  para marcar as liñas básicas do que sería a axenda da semana en relación cos contidos do programa. Posteriormente, tivo lugar unha visita á cidade conducida polas guías sonoras feitas por estudantes do instituto napolitano.

A seguinte xornada centrouse principalmente nun percorrido con guía polos restos da cidade romana de Pompeia.

O mércores  foi dedicado ao achegamento á realidade migratoria de Nápoles, tema de especial relevancia no día a día desta urbe italiana. Visitouse primeiramente a casa Fiber, centro de acollida de menores emigrantes non acompañados. O alumnado do programa coñeceu de primeira man a realidade nada fácil destes rapaces, podendo así mesmo compartir un momento de lecer cos mesmos.

 A tarde foi empregada na realización do coñecido como Migrantour, onde se puideron visitar institucións que dende hai lustros focalizan os seus esforzos en apoiar e dar cobertura á poboación emigrante en múltiples planos como o social, laboral ou legal.

O seguinte día, visitaron o impresionante Pazo Real de Caserta.

Trala visita iniciáronse os traballos dos equipos formados por estudantes de diferentes países para a realización das presentación finais. Estes artelláronse a través de varios puntos de investigación e reflexión a partir da experiencias das xornadas anteriores, sendo as liñas principais a exposición das necesidades dos emigrantes, as actuacións que as institucións deberían levar a cabo ao respecto, a impresión da situación  da emigración na propia cidade, e a comparación da mesma cos respectivos lugares de procedencia de cada un dos participantes do programa.

Estes traballos complementáronse na xornada final, onde tiveron lugar as presentacións finais e conclusións.

A semana pechouse cun acto de clausura coa entrega dos diplomas correspondentes. 

Segunda mobilidade: Social media inclusion

Silleda. Outubro de 2022.

Esta vez fomos nós os anfitrións. Recibimos en outubro 2022 aos nosos socios de Romanía, Italia e Alemaña. Algúns estudantes e profesores xa eran coñecidos para nós e outros eran novas incorporacións. Ían estar en Silleda unha semana para traballar o tema das redes sociais e a inmigración dentro do noso proxecto R.E.F.U.G.E.

O primeiro día; coñeceron o centro,  fixeron  as presentacións oportunas, o reparto de grupos de traballo  e a través dun xogo de pistas coñeceron Silleda: a súa xente e a súa cultura.

No noso centro impártese o ciclo medio de Guía no Medio Natural e Tempo de Lecer, polo que o noso alumnado fixo de guía nunha visita a un entorno especial que afortunadamente temos na contorna. Estivemos no Mosteiro de Carboeiro e despois fixemos unha pequena ruta ata a Fervenza do Río Toxa na que o noso alumnado explicou a flora e os puntos de interese. Foi unha experiencia moi gratificante tanto para os visitantes como para os futuros guías. Aos estudantes locais integrantes do proxecto encantoulles que os guías foran os seus propios compañeiros de centro.

Despois de repoñer pilas cun bo xantar, volvemos para o centro para entrar en materia de traballo. Recibimos a dúas persoas que nos falaron de algo moi interesante: Experiencias da inmigración na Comarca do Deza. Por unha banda, Alba Seijas voluntaria da Asociación Carabelo de Lalín, falou dos orixes e a fundación desta asociación e de como ela colabora con eles.

Por outra banda, a nosa alumna Salma Sodki, contounos as súas vivencias como inmigrante de Marrocos, desde a súa nenez ata agora. Estes dous testemuños foron o punto de partida para o traballo do noso proxecto estes días: a inclusión e non discriminación nas redes sociais.

O martes pola tarde os grupos de traballo puxéronse xa en marcha: brainstorming,  busca de información e accións que levarán a cabo para favorecen a integración e a non discriminación nas redes sociais.

Mércores 19:  foi un día completo en cuestión de traballo, pero fixemos unha pausa para facer unha visita institucional ao Concello de Silleda, onde o alcalde nos recibiu moi agarimosamente.

O resto da xornada os grupos estiveron traballando no proxecto: deseñar un plan de acción para a promoción e inclusión dos inmigrantes nas redes sociais, centrándose en problemas como: discurso de odio, violencia e radicalismo na rede.  O produto final sería presentado o venres.

Ao día seguinte, o xoves 20 organizouse unha saída a Santiago de Compostela, cidade que representa moi ben a mestura de culturas, razas e o acollemento a persoas de distintas orixes.

Primeira parada; Cidade da Cultura, onde fixemos unha visita guiada en inglés cunha magnífica guía, Patricia Toimil, quen nos fixo a estancia moi agradable e pracenteira.

Segunda parada: Catedral onde fixemos unha visita guiada en inglés polos tellados, contemplamos o Pórtico da Gloria e a mesma Catedral. Tamén os participantes do proxecto contaron con tempo libre para descubrir a cidade.

O venres era o día de despedida e de presentar o produto final, un póster. Foi un día de celebración. Parte do alumnado de música de 3º e 4º de ESO xunto co seu profesor Javier Mª López Rodríguez ofreceron un mini-concerto onde tocaron diferentes pezas con diferentes instrumentos, entre as pezas, unha interpretada por alumnado de 4º ESO, unha tradicional con dous dos nosos gaiteiros. Como peza final, tres alumnas formaron un grupo de vento e interpretaron o himno de Europa.

Despois do concerto presentaron os seus pósters que serán distribuídos por distintos centros escolares e organizacións.

Rematamos a semana cun xantar conxunto, elaborado por O refuxio de Merza, así despedímonos dos nosos compañeiros ata a seguinte mobilidade que será a Italia.

Primeira mobilidade do proxecto. Maio 2022

Por fin o noso alumnado do proxecto Erasmus puido viaxar!!! Despois de dous anos de espera 6 estudantes viaxaron a Brilon, Alemaña para traballar no noso proxecto europeo sobre refuxiados e migración. Alí esperábannos os anfitrións xunto co alumnado de Nápoles, Italia e Lugoj, Romania.

Durante unha semana traballaron sobre o tema dos refuxiados, neste caso centrándose na situación de Ucraína. O primeiro día fixeron xogos de presentación para coñecerse en persoa, xa que o contacto ata o de agora fóra a través da rede.

Os estudantes traballaron en distintos grupos  durante os tres días antes da presentación do traballo final o venres.

Non foi so traballo, este proxecto permitiu tamén coñecer diferentes lugares de Alemaña:

• a propia vila de Brilon, onde fomos recibidos polo alcalde antes de facer unha tour cunha guía en inglés quen nos contou a cousas moi interesantes do lugar.

• a pequena cidade de Paderborn famosa pola súa igrexa e o monumento aos tres coellos.

• Colonia, unha das cidades mais importantes do país xermano, onde visitamos a súa catedral e as súas rúas ateigadas de xente. De camiño fixemos unha parada en Essen para ver o museo da minería, actividade esencial na economía desta zona do Rin.

Estas pequenas viaxes permitiron coñecer a cultura do país así como fixeron posible a interacción entre todo o alumnado.

Encontro virtual Silleda 2021

A semana do 8 de novembro seriamos nós os anfitrións do noso proxecto Erasmus “R.E.F.U.G.E”, pero seguimos sen poder viaxar por mor da pandemia, polo que unha vez máis celebramos un encontro virtual. Esta vez o grupo de traballo trasladouse á Casa da Cultura de Silleda onde o alumnado traballou acerca do tema en cuestión, esta vez baixo o título: Lives that come and go: past, present and future. Os catro países traballaron conxuntamente acerca da migración e as súas circunstancias no pasado, no presente e no futuro.

Na primeira xornada presentáronse vídeos de experiencias de xente da contorna que por distintos motivos decidiu marchar ao estranxeiro ou vir a vivir á vila de Silleda. Do mesmo xeito visualizáronse tamén exemplos de migración nos países integrantes do proxecto, onde ex-alumnado e alumnado de Italia, Rumania e Alemaña contaron as súas vivencias.  Pódese ver aquí o vídeo elaborado polo nosos estudantes Erasmus.

Nas seguintes xornadas ao longo da semana o alumnado dos catro países buscou información e debateu sobre a temática do seu grupo para despois elaborar as súas presentación, os temas a tratar eran: a influencia da migración no contexto dos seus países, causas da migración no século XX, causas da migración na actualidade, e a migración no futuro tendo en conta o obxectivo 10.7 da Axenda 2030.

 Despois das presentacións todos os integrantes do proxecto participaron nun Kahoot  con preguntas sobre o traballado e exposto.

Estas presentacións e o Kahoot serán presentadas nos distintos cursos do instituto.

Presentación

Desde o curso 2020-2021 o IES Pintor Colmeiro  forma parte dun proxecto Europeo Erasmus K229 baixo o nome de R.E.F.U.G.E (stRategic alliancE For encoUraginG intEgration).  O noso centro xunto con : BERUFSKOLLEG FÜR WIRTSCHAFT UND VERWALTUNG BRILON DES HOCHSAUERLANDKREISES de Brilon, Alemaña; LICEUL TEHNOLOGIC AUREL VLAICU LUGOJ de Lugoj, Romania e ITIS POLO TECNICO FERMI-GADDA de Napolés traballaremos para conseguir un obxectivo común. reflexionar sobre a situación da migración en Europa.

Na liña coa Axenda 2030  o proxecto REFUGE une estes catro países para afrontar o mesmo reto, construír as mesmas oportunidades para todos os estudantes e en especial para os que veñen dun entorno migratorio. A idea é implicar a toda a comunidade educativa en grupos de traballo para abrir discusións e debates para despois intercambiar resultados, conclusións e metodoloxías a través de encontros virtuais ou físicos  grazas as distintas mobilidades. Créase así un camiño transnacional para fomentar a reflexión acerca da migración en Europa  que vén  determinada polas complexas situacións políticas e económicas dos distintos países integrantes do proxecto.  Os catro países reflexionaremos sobre a importancia de condutas e accións diarias que favorezan a integración, a inclusión e a non discriminación.

O produto final será o REFUGE – Toolkit,  ferramentas  que serán útiles para promover valores europeos de democracia, inclusión, non-discriminación e integración, estas ferramentas serán presentadas polo alumnado dos distintos países socios empezando polas escolas e chegando a toda a comunidade local.

Primeiro encontro virtual

Dadas as circunstancias no curso 2020 -2021 a primeira mobilidade tería que ser a Alemaña, a visitar o instituto de Brilon. Ao non poder realizar a viaxe, fíxose un encontro virtual para coñecernos e empezar a traballar no proxecto. Visionáronse vídeos de presentación dos catro países. Podes ver algún aquí

Durante a semana do 19 ao 23 de abril estudantes e profesores dos catro países desenvolvemos actividades acerca da situación da migración en Europa. O resultado desta viaxe virtual foron as elaboracións de presentacións sobre as súas investigacións e debates sobre as mesmas.